“Эрдэнэс алт ресурс” ХХК-иас Дундговь аймгийн Онцгой байдлын газартай хамтран Салхит уулын баяжуулах үйлдвэрийн ажилчдыг байгууллагын аюулгүй байдлыг хангуулах, гал, гамшгийн аюулаас урьдчилан сэргийлэх, тэмцэх арга хэмжээний мэдлэг олгох, аюулт үзэгдэл, осол тохиолдсон үед хохирол багатай даван туулах чадвар эзэмшүүлэх зорилготой сургалтад хамрууллаа.

2024 оны арваннэгдүгээр сарын 19-ний өдөр зохион байгуулсан энэхүү сургалтыг Дундговь аймгийн Онцгой байдлын газрын Гамшгаас хамгаалах төлөвлөлт, бэлэн байдал хариуцсан ахлах мэргэжилтэн, гамшгаас хамгаалах улсын хяналтын байцаагч, Дэд хурандаа Л.Дорждэрэм, Гал түймрийн улсын хяналтын байцаагч, Ахмад Ч.Нацагдорж нар удирдаж явуулсан юм.

Сургалтаар:

- Гамшгийн эрсдэлийн үнэлгээ түүний ач холбогдол.

- Аюулгүй амьдрах мэдлэг.

- Гамшгаас хамгаалах тухай хууль, түүний хэрэгжилт.

- Гамшгаас хамгаалах төлөвлөгөө боловсруулах заавар, төлөвлөгөөний хэрэгжилтийг хангуулах.

- Галын аюулгүй байдлын тухай ойлголт.

- Галын аюулгүй тухай хууль, түүний хэрэгжилт.

- Гал түймэр унтраах техник, багаж хэрэгслийн танилцуулга зэрэг сэдвүүдийн хүрээнд тодорхой ойлголт өглөө.

 Танхимын сургалтаар олж авсан мэдлэгийг бататгахаар гал унтраах дадлага сургуулилтыг гэрээт компани бүрээр 7 баг болгон хувааж 2 өөр аргаар галыг хэрхэн хурдан шуурхай унтраах тэмцээн зохион байгуулав. Мөн гал унтраагуур ашиглан гал түймэр унтраах тархалтын сургууль хийсэн бөгөөд сургалтад Салхит уулын баяжуулах үйлдвэрийн бүсэд үйл ажиллагаа явуулж байгаа гэрээт компанийн инженер техникийн ажилчид хамрагдсан юм.