Монгол Улсын Ерөнхийлөгч У.Хүрэлсүх уур амьсгалын өөрчлөлт, цөлжилтийг сааруулах зорилгоор 2030 он хүртэл “Тэрбум мод” үндэсний хөдөлгөөн өрнүүлж буй. Уг хөдөлгөөнд уул уурхайн салбарынхан манлайлан оролцож байгаа билээ. Тэдний зүгээс нийт 120 сая мод тарихаа илэрхийлээд буй бөгөөд үүнээс “Эрдэнэс Силвер Ресурс” ХХК 3 сая мод тарихаа амлажээ.
Өнөөдрийн байдлаар улсын хэмжээнд 9.2 сая ширхэг тарьц, суулгацын нөөцтэй байна. “Тэрбум мод” зорилтдоо хүрэхийн тулд тарьц, суулгацын хэмжээг одоогийнхоос 9-10 дахин нэмэгдүүлэх шаардлагатай байгаа юм.
Ташрамд дурдахад, Монгол орны нийт нутаг дэвсгэрийн 76.9 хувь цөлжилтөд өртөөд байгаа бөгөөд үүний 23 хувь нь нэн хүчтэй цөлжилтөд өртжээ. Тиймээс цөлжилтийг бууруулж, ойн сан бүхий газар нутгийн хэмжээг тэлэх нь нэн чухал ач холбогдолтой талаар мэргэжилтнүүд санал нэгдэж буй юм.
