“Эрдэнэс Алт Ресурс” ХХК Бүх нийтээр мод тарих үндэсний өдөрт идэвхи санаачилгатай оролцдог уламжлалтай болсон бөгөөд 2024 оны хавар, намрын бүх нийтээр мод тарих өдрүүдэд нийт 75,555 мод тариад байна.

Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнд тус компани нэгдсэн бөгөөд уур амьсгалын өөрчлөлтийн нөлөөллийг бууруулах, цөлжилтийг сааруулах, ой, усны нөөцийг хамгаалахад хувь нэмэр оруулахыг зорьж байгаа юм. Энэ зорилгынхоо хүрээнд “Эрдэнэс Алт Ресурс” ХХК туслан гүйцэтгэгч компаниудтайгаа хамтран 2024 оны намрын Бүх нийтээр мод тарих үндэсний өдрүүд буюу 2024 оны аравдугаар сарын 01-05-ны өдрүүдэд Салхит уурхайн “Эрдэнэс төгөл”-д 20 мянган хайлаас модны суулгац тарилаа.

2024 оны хаврын бүх нийтээр мод тарих өдрүүдэд “Эрдэнэс Алт Ресурс” ХХК-ийн таван жилийн ой тохиосон бөгөөд ойгоо угтаж таван бүтээлч ажил хийхээр төлөвлөсний нэг томоохон ажил нь 55,555 мод тарих байв. Үүнийгээ амжилттай гүйцэтгэсний зэрэгцээ энэ намрын Бүх нийтээр мод тарих өдрүүдэд ийнхүү 20 мянган ширхэг мод нэмж суулгаснаар тус компани 2024 онд нийт 75,555 мод тариад буй юм.

Хариуцлагатай уул уурхай хөгжиж, эх дэлхий, байгаль орчноо хамгаалах ариун үйлс бүхэн дэлгэрэх болтугай.